حـالـة الاحـبـاط فـالـمـنـتـديـات

|--*¨ حـالـة الاحـبـاط فـالـمـنـتـديـات ¨*--|

--------------------------------------------------------------------------------

السلام عليكم ورحمة الله وبركاته ..

مرحبا بالجميع ..

اختفيت ورجعت ..

رجعت بعد ما فكرت فموضوع شغل بالي كثير ..

ويمكن شغل بال الكثيرين من القائمين عالمنتديات ..

من سنين أذكر اني ترددت اشترك فمنتدى من المنتديات ..

حسيت ان ما عندي وقت ( لهالسوالف ) خخخخخخخخخ ..

ولكن فاجازتي السنوية كنت فاضيه ..

قلت فخاطري ليش ما اجرب ..

طبعاً فالسابق ما تلاقون غير كمن منتدى بس ..

وهناك كثافه عدديه فعدد الاعضاء ..

وبعض المنتديات كانت تغلق التسجيل ( ما شا الله ) ..

واليوم المنتديات تلقاها بضغطه زر ..

دعوة تلقاها من فلان وعلان ..

دعوة توصلك للمشاركه فمنتدى ( صديقه مثلاً ) ..

او انها مشتركه هناك وتبا اللي تعرفهن وياها ..

وأنا حليلي ماحب ارد حد ..

على طول أسجل ( يقصون عليه ) هههههههههه ..

المهم ....

اللي يشترك له الكثير من التطلعات والمواهب ..

وخصه اللي يحبون يكتبون ( شرات حالتي ) ..

يدورون الردود بفارغ الصبر على مواضيعهم ..

يبون اللي يقيمهم ..

وينتقدهم قبل لا يشكرهم ويمدحهم ..

وساعات ودهم بناس معينين أكثر من غيرهم يردون على مواضيعهم ..

كون هالناس يردون بعقلانيه وفهم ..

بدل من اني ألقى شخص داش عرض ..

بدل ما يناقش موضوع حاطينه للنقاش ..

* يدش ويقول :

( مشكوره ) ..

أو ( الله يعطيج العافيه ) ..

أو ( تسلمين وما قصرتي ) ..

أو ( بدون تعليق ) ..

ردود محبطه ..

ردود تبين مستوى التفكير ..

ردود تبين ان هالشخص همه عدد المشاركات بس ..

أذكر اني مريت بنوع أو أنواع فالمنتديات ..

فالبداية ما كنت اعرف سوالف المنتديات والاشراف ..

أول ما حطوني ( مشرفه ) في أحد المنتديات ..

قلت فخاطري : " وابوييييي متى بتفيج وبرد عالناس ؟؟!!! " ..

سألت المشرف اللي ويايه وبصراحة ما قصر وعلمني كل شي ..

ومن يومها فهمت كيف اشرف ..

ولقيت بعض الناس يطرشوا لي رسايل خاصه ..

يبوني اتوسط لهم عسب يصيرون مشرفين ( معقووووله ) .. ههههههههه ..

واللي يطرش رساله يواشي على فلان وعلان ..

أصناف وارناق ..

ولكن ..

نلاحظ في حالات ..

نلاقي ركود غير طبيعي فالمنتديات ..

شرات ركود الاسهم والبورصات ..

صرنا شرات الفاكهه ..

لنا مواسم ..

ساعات يقولون المنتدى راكد لان :

" الطلبه عندهم امتحانات " ..

" الناس مسافرة لان نحن فالصيف " ..

" الموظف مزحوم ويوصل تعبان وما يقدر يجابل المنتدى "

وساعات نلقى بعض من يدير المنتديات يعصب ..

ويطلب من البعض ( اقصد المشرفين ) الدخول لو ساعه

فاليوم ..

ومن خبرتي او معرفتي ..

ساعات والله ودنا ندش لكن الظروف تحول هالشي ..

وساعات تلقى مشرف عام يقدر ظرف الشخص ويحترمه ..

وساعات نلقى مشرف عام ما عنده كاني ماني ( يعفي المشرف

على طول ) !!!! ..

ما الوم اللي يعفي المشرف بسبب تقصيره ..

وما الومه اذا غاب المشرف لأسابيع وأشهر وماله حس ..

لأن كل مشرف عام يدور مصلحه منتداه ..

واكيد له تطلعات واماني من ورا هالمنتدى ..

بصراحة ..

تعلمت شغله من المنتديات :

( الصبر ) ثم ( الصبر ) ثم ( الصبر ) ..

لازم على كل عضو ان يصبر ..

لا يتطلع للعلالي ..

امور راح تحبطك ..

مثل قله الردود ..

او يمكن محد يرد على موضوعك ..

او بتحتك بناس ما يحبون الا القيل والقال ..

وبتلقى ناس جدامك مطاوعه ووعاظ ..

ومن تعرفهم تلاقيهم مراهقين ..

وناس تلاحققك تبا تتعرف عليك ..

ومن تعرفك ..

بحححححححح ..

خلاص ما تلقاهم ابد ..

يتني فترة ادمنت عالكتب ..

كتب عربية واجنبية ..

استفد كثير من المعلومات اللي قريتهن ..

فكرت في فتره الخص كتاب او كتب ..

عسب يستفيد الجميع ....

مع العلم اني ادري من راح يقرا بالضبط ..

صابني احباط فالبداية لان العدد اللي راح يقرون قليل جداً ..

لان الناس اللي تدخل المنتديات ما تحب هالمواضيع الجاااااااااااده ..

تعوذت من ابليس وقررت اني الخص ..

ولكن الامر يحتاج لجهد ..

لاني ابا الخص بشكل مبسط ..

أدري اني ما راح استفيد ..

ولكن ( لي الأجر ) ..

ومن هذا كله نلقى ان :

* المنتديات :

دنيا ..

علوم ..

مشاكل ..

تناقضات ..

أحزاب ..

قصص عاطفية ..

غيره ..

كره ..

مخططات ..

أصدقاء .. ....... الخ ..

ورسالتي لكل " محبط " أو

" شارد من منتدى " :

المنتديات واحة .. ممكن تجف ..

الهروب والاحباط هب حل ..

والطيران من منتدى لمنتدى بلا فايده هب حل ..

علينا اثبات من نكون ووين ما نكون ..

علينا نبين للجميع خصالنا الحسنة ..

نشد حيلنا ...

نعمل لنفسنا ..

عسب يكسب المنتدى عضو ..

لا يمكن حد ينساه او يتناساه ..

وهب من مشكله نختفي ..

علينا مواجهه المشاكل ..

والهروب هب حل ..

علينا بالصبر ..

واذا فيوم حبينا هالمنتدى ..

ومدحناه .. ومدحنا اللي فيه ..

كيف يجينا يوم ننتقده وننقد اللي فيه ..

فالنهاية :

" اترك لنفسك بصمة وين ما تسير

وتحل "

عدد الرسائل : 6 تاريخ التسجيل : 01/09/2008

طبعا الرد السابق............مجرّد دعـــــابة + زيادة مشاركــات

أختـــــــــــاه....لقد أصبتِ في كثيــــر إن لم يكن كل ماذهبتِ اليــــه

المنتديــــــــات عالم اخر يضاف الى عوالمنـــا...يجد فيه كل منا اريحية وحرية التعبير –الى حد ما - عن رأيه...

ولكن وللأسف فالمنتديـــات الإمــــاراتية ضعيفة نوعا ما إذا ماقارناها بقرينتها (السعودية) مثلا.... فهامش الحرية في منتدياتنا يكاد يكون لايذكر.....بينما تتمتع منتدياتهم بقدر أكبر من الحرية..... وهذا لاينفي أن أقوى منتدى عربي (إمـــاراتي)......ولكنه يقف وحيدا في طابور طويـــــــــــــــــــــل

أختاه فيما يخص الردود......أجدني متعاطفا معكِ بل أؤيدكِ تأييدا تـــاما فالكثير منها محبط....ولكن الأشد إيلاما من (مشكور) و(يعطيك العافية) و(موضوع جميل)......أن الفرد منا يلتمس في (نبرة) الرد حقد شخصي على الكــاتب,,,,,لا على فكرة الموضوع.....وأنا دائما اعزي نفسي عندما اواجه مثل تلك الردود بأنه الحقد ولاشيء غيره......فكيف لهذا الشخص وهو الوافد الجديـــــــــــــد على المنتدى أن يحضى بهالة وإشادة لم يحلم بها رغم كل تلك السنوات التي قضاها في المنتدى..........

بخصوص الإشراف............خضت تجربة مشابهة. لتجربتكِ......وفشلت فشل ذريع.....كوني مع إعطــاء المزيد من الحرية للجمهور....مالم يمس الثوابت......فلسنا في حضانة حتى تفرض علينا الوصاية ! واذكر احد الإخوة المراقبين هنــــا.....ومع أول يوم له كمراقب.....حب يثبت وجوده......ولم يجد سوى العبدلله ليمارس عليه سلطــاته (الحديثة)........فعاث في موضوع لي قصا....ولم يكتفي بذلك بل قام بتحريفه....وتلك لعمري سابقة لم اسمع بها قط.....وكما اسلفت فأنا دائما ما ارده لعدم قدرته –أي المراقب- على ان يكتب بـ 25% من مستوى شخابيط اخوك (اللي هو أنا)

بخصوص قلة عدد الزوار.......اقصد زوار الموضوع فأعتقد أن المشكلة تكمن في اختيــــــار العنوان.... فالعنوان يمثل 20% من الموضوع.....وهذه وجهة نظر شخصية جدا........

بخصوص التنقّل بين المنتديــــــات فلا ارى ضيرا فيه....حتى يجد المكان الذي ينـــــاسبه.... وهذا احد ابسط حقوقه.....

بخصوص البرود والجمود الذي يصيب المنتديات فتلك أم المعضلات.........وتجدين دائما الأعذار جاهزة
- مدارس
- امتحانات
- إجازة
- مناسبات معينة كالأعيــــاد ورمضان
بصراحة لم اعد اعلم متى تحل فترة المواسم الإنترنتية !

واعذريني أختــــاه على الإطـــــالة

اخوك

عدد الرسائل : 10 تاريخ التسجيل : 04/05/2008

بومزنه

انت اي منصب بتمسكه اكيد رح تفشل فيه
هههههههههههههه

امزح معك

اختي رثام اشكرك كل الشكر على موضوعك الطيب

كلامك في محله

والحمد لله طلع لنا وحده شرات بومزنه
ههههههههههههههههه

الله يعطيك العافيه اولا

وثانيا
الاجزاء الي طرحتيها كلها كانت في محلها وخصوصا زيادة المشاراكت والاشراف ووو...الخ

لكن اعجبتني انك ادرجت الصبر في موضوعك
هذا طيب منك

واما الاستفاده
الي يبغى يستفيد المجال اماه ومحد يقله خليك عالخرابيط وبس

والي ما يبغى هو حر ايضا

اشكرك مرة ثانيه وما قصرتي

السلام عليكم

رثام
في البداية احب ان اخبرك بأن مواضيعك جميلة وتدل على رقي تفكيرك ليس في هذا الموضوع فقط بل فيما طرحتي سابقا ايضاً< قد يفرحك هذا الكلام وهذا ما اريده فعلا = هنا تكمن جمالية المنتديات
كثيرا ما نفتقد الطريقة التي نعبر بهاعن امر ما يشغل تفكيرنا فنأتي لنفرغه هنا ( بغض النظر عن الردود عليه) لا اقول انها غير مؤثرة على العكس ولكن الخطوة الاولى التي اردناها تمت وهي ابداء رأي او افصاح عن احساس واسلوب تفكير
ثم تأتي الخطوة الثانية وهي مناقشة الردود التي قد تغير تفكيرنا السابق او تزيد من تمسكنا به

قليلا ما اطرح مواضيع في هذه القلعة ربما يكون السبب هو القراء!!
يهمني كثيرا وجهة نظر الاخرين حول ما اقوله فحين افكر في موضوع علي ان اضع في بالي انه طرح لمجموعه من الاشخاص يختلفون في الآراء والفهم لذا علي ان اقنعهم بفكرتي قبل كل شي واتحمل كل مايصدر منهم ضدي وان لا انغر بمن امتدحني منهم
/
اما ردودي فهي ما افكر فيه فقط!! لا ما احس به..
فقد ارد رد صريح جدا عكس ما اراده الكاتب ثم احس انه استاء من ردي بعد تعقيبه على الرد
حينها لايهمني لانه لايعرفني حقيقة ولكنه يجب ان يعرف اني افكر بتلك الطريقة ويجب عليه تقبلها وان لايفسر الموضوع على انه عداوة شخصية لاني لا اعرفه في الحقيقة ، لأعود واسعده برد في موضوع آخر هو حقا يستحقة (لان المجاملة هنا سم مدسوس في كعكة الرد التي لا احسن صنعها)

وبس